Chuvash.Org :: Пичет версиĕ :: Пуппа тарçи
Чăваш этнорадиостанцине сирĕн пулăшу кирлĕ.
Пурăннă пулнă пĕр пуп. Пĕрре пуп тарçă тытнă та килне илсе пынă.
— Ну, тарçă, лайăх ĕçле. Лайăх ĕçлесен, ахаль тумастăп,— терĕ пуп.
Тарçă пĕр эрне пурăнсан, утă çулмалли вăхăт çитнĕ.
— Ачам, — тет пуп тарçине, — турă пулăшнипе чипер выртса çывăрар та ыран ирех утă çулма кайăпăр,—тет.
— Юрать, — тет тарçă пупне.
Хай кусем ирхине ирех тăчĕç. Ирех тачĕç те, пупĕ матăшкине калать:
— Маташкă, пире ирех апат çитер-ха, эпир улăха утă çулма каятпăр, — тет.
Майри сĕтел çине апат илсе пырса лартрĕ. Пупĕпе тарçи çирĕç те, пупĕ тарçине калать:
Ларнă-ларнах, кантăрлахи апат та çиер, вара канмасăр каçаллачченех çулар, — тет.
Тарçи:
— Юрать, — тет.
Майри кантăрлахи апат та илсе пырса лартрĕ. Пупĕпе тарçи пĕрер кашăк çирĕç те тăранчĕç. Пупĕ тарçине калать:
— Ларнă-ларнах, каçалла апачĕ те çиер, вара каçхи апатченех çулăпăр, — тет.
— Юрать, — тет тарçи.
Пуп майри каçаллахи апат та пырса лартрĕ. Весем каллех пĕрер кашăк сыпрĕç те тăранчĕç. Пупĕ:
— Ларнă-ларнах, каçхи апат та çиер, — тет.
— Юрать, — тет тарçи.
Пуп майри каçхи апат та илсе пырса лартрĕ. Пĕрер кашăк сыпрĕç те тăранчĕç. Тарçи хай чаппанне илчĕ те тухса кайма хатĕрленчĕ.
— Ăçта каятăн эсĕ? — тет пупĕ.
— Мĕнле ăçта? Хăвăрах пĕлетĕр, пуп атте, каçхи апат çисен, кам ĕçлет. Каçхи апат çисен, çывăрма выртаççĕ, — тет.
Лупасайне кайре те тарçи тепĕр тул çутăличчен çывăрчĕ. Çавăнтан кайран вара пупĕ тарçине нихçан та пĕрре ларсан ирхи, кантăрлахи, каçаллахи тата каçхи апат çитермерĕ, тет.
Тěп страницă
Тулли верси :: Статья ссылки